أنواع البراغي

مين فينا ما سمع عن طئطئة البراغي باللهجة السورية ؟؟؟؟

مين فينا ما عمرو طئولو يرغي طلع من راسو؟؟؟؟ طيب عمرك فكّرت شو معنى البرغي...البرغي باختصار: هو ضحك بالوجه ومن وراك يحكي عنك للمسئول بكلام صحيح أو كذب وإنت بتضحك وبتلعب ومو عرفان شو عم بصير من ورا ظهرك

أنواع البراغي؟؟؟؟
البراغي أنواع عدة نذكر أشهرها، حاول تراجع البراغي اللي أكلتها بحياتك واللي إنت ضربتها وشوف بتنتمي لأي نوع

البرغي الموجّه
-----------------------ويتكون هذاالبرغي من رأس أحادي يكون موجّه إليك مباشرة من عدوّ لك بالشغل متربص فيك ومستنّي الفرصة وإنت من شطارتك عطيتو الفرصة فطقلك برغي محترم

البرغي الجماعي أو – ملتي برغي

-----------------------------------

وهذا من أقوى البراغي ويكون مفعوله شديداً وبيكون مجموعة من الموظفين بيضربوا موظف واحد... برغي من الآخر عند المدير... وطبعاً لإنهم جماعة المدير راح يعتبر إنهم صح وإنت غلط 

برغي متعدد الاتجاه أو ملتي دايركت برغي
----------------------------------------------------------------------------------وهذا البرغي بتضربو عند مديرك وإنت قاصد فيه- والنية بالقلب - شخص معين وإنو ما بيحافظ على مصلحة الشغل وإنو ضد مبادئ الإدارة وبالجملة بتلطشلك خمس ست موظفين بالمعيّة مو عاجبينك وشايف إنهم ممكن يضرّوك، وهذا يعتبر من أذكى البراغي لإنك ضربت عشر براغي بحجر واحد

برغي الرحمة
------------------- وهو برغي نادر تطلقه بحالة تشوف صاحبك تعبان من الشغل ومو عاجبتو الشركة والموظفين بيعطوه شغل كتيير فوق طاقتو والأخ ممكن من الضغط يروح فيها...فبتروح حضرتك عند المدير وبتلعن سنسفيل أبوه لصاحبك حتى يقوم المدير ويقدم فيه عريضة ويكحشو وهيك بتكون إنت أطلقت عليه رصاصة الرحمة وخليتو يقعد بالبيت معزز مكرم

إن دايركت برغي
---------------------------------------------وهو من أقل البراغي فاعليّة يصدر من واحد قرفان زهقان عندو مبدأ عليّ وعلى أعدائي وبيروح عند المدير وبدال صباح الخير بيقللو: 'إنت لو بتضبّ موظفينك بدل ما إنك قاعد ورا الكرسي، ولك شوف شو عم بصير…' وبتصير تسلخ شمال يمين وإنت مو عارف ليش أو مين بس كل هدفك تفش غُلّك وطبعاً ما تتوقع الشباب حيتركوك بعدها لإنك لكشت الكل وما إلك صاحب

ريفيرس برغي
--------------------------------------------وهو من أغبى البراغي يصدر من إنسان غبي تافه معوّق طافي رايح يدق صاحبو برغي بيلاقي حالو إنه دق بحالو برغي !!! مثلاً بتقول للمدير: 'ترى خالد طول نهارو بيدخّن بالشركة (وطبعاً الدخان بالشركة ممنوع) والمشكلة إنّو دايماً بيتسلبط عليّ وبدخن من باكيتي

برغي طويل المدى
------------------------- وهذا البرغي لا يطلقه إلاّ الخبثاء وهو على دفعات وقليل الجرعة بتضلّك تزت براغي صغيرة ومع الوقت بتتجمع عند مديرك إنو فلان الفلاني عليه مشاكل كثيرة ولازم نأدبو وهيك إنت بتكون كإنك ما عملت شي – تراكمات يعني – وهادا برغي مضمون النجاح وقد أثبت فاعليته عند الشباب الطيبة

برغي موجّه بالأقمار الصناعيّة
---------------------------------------وهذا البرغي ما إلو علاج ولا مضاد حيوي لإنه برغي من شخص واصل من فوق فالأفضل تاخد حذرك من هيك أشخاص مشان تضمن حياة سعيدة هانئة بشركتك

• 
  ومتل ما نحنا شايفين تختلف البراغي بنوعها وتأثيرها، بس من خبرتي إنو راح يجي يوم أسود عليك تنردلّك كل البراغي ووقتها حتبكي دم على براغيك القديمة ولو سألتني بحكم خبرتي البسيطة
  
  
   عليك بتناول الكثير من فيتامين الوقاية 'فيتامين واو' (الواسطة) لإنها بتشكل جهاز ردع ضد طقاقين البراغي
  عليك بالإكثار من الحذر والخبث والتحفظ.....ممكن ذلك يخفف فقط ولو إنو البعض يشكّك في ذلك ويقول: وداوِها بالتي هي الداء....يعني طقلو برغي فيه الصبح قبل ما يطقلك برغي فيك المساء
  إمشي الحيط الحيط ودايماً قول حاضر ....ولا تقول لأ....ومع ذلك برضو بدو ينطقلك برغي مو بكيفك مكتوب عليك
  كل يوم صبّح على مديرك وإسألو: ايه شو الأخبار؟ إن شاء الله ما في أولاد حلال حكولك شو حكينا عنك مبارح؟؟؟